Ветеринария, мал чарбасын өнүктүрүү, жайыт жана тоют кызматынын алдындагы “Кыргыз мамлекеттик асыл тукум завод” мамлекеттик ишканасынын базасындагы Мамлекеттик машина-трактордук станциясынын (МТС) техникалары дыйкан-фермерлерге жардам көрсөтүү максатында күзгү айдап-себүү иштерине келишимдик негизде тартылууда.
Бул аракет айыл чарбасын колдоого, жергиликтүү дыйкандардын өндүрүштүк чыгымдарын азайтууга жана техникалык мүмкүнчүлүктөрүн кеңейтүүгө багытталат.
МТСтин заманбап тракторлору жана айыл чарба шаймандары:
• күзгү айдоо,
• жерди даярдоо,
• дан жана тоюттук эгиндерди себүү иштерине пайдаланылууда.
Дыйкан-фермерлер техника кызматтарын жеңилдетилген шарттарда келишим түзүү аркылуу ала алышат. Бул өз кезегинде айыл чарба өндүрүшүнүн көлөмүн жогорулатып, азык-түлүк коопсуздугун камсыз кылууга өбөлгө болот.
Ведомствонун маалыматы боюнча, МТС ишинин натыйжасында:
• айыл чарба иштеринин сапаты жогорулайт,
• фермерлердин чыгымдары кыскартылат,
• айыл жергесинде эгин түшүмдүүлүгүн арттыруу мүмкүнчүлүгү түзүлөт.
Мамлекеттик машина-трактордук станциялар дыйкан-фермерлерди техника менен камсыз кылуу аркылуу айыл чарба тармагын механизациялоодо маанилүү ролду ойнойт.
